بسم الله الرحمن الرحيم
احم احم نبدأ الموضوع على بركه الله
احيانا ما يفعل الانسان الكثير من الافعال التى قد يندم عليها وقد يشعر بالخطاء اتجاه فكره ما
وهناك من يخطء ولا يدرى وهناك من يفعل ولا يخطء
عربي ده يا مرسي
نبسط المسأله شويه
بصراحه التجارب العديده الى مرت بحياتى كاحد الشباب المصرين المدافعين عن الكيان المصرى العربى
خلتنى عندى وعى تماما اننا عمرنا ما هانتغير
( في المشمش)
او بالمعنى الابسط عمرنا ما هانشوف تلميذ في التعليم ده مخترع ذره
( احلم يا معلم احلم )
وعمرنا ما هانشوف تعليم كويس
على سبيل المثال :
المثال وليس الحصر
الانترنت
مفيش شك انو كان ليه دور كبير فى زياده الحركه المعلوماتيه تجاه الدول الناميه ( اللى ذى حالتنا )
ولكن للاسف الشديد الطبع يغلب التطبع
اصبح النت لنصف شباب مصر بيستخدمو النت لحاجتين ملهمش تالت
ياما الشاااات ( وغرف المحادثه والمزز وصباحو عسل بأذن الله )
ياما ( مواقع ثقافيه و طبعا المواقع دى منتشره وبكثره واصبح بيتفرج عليها الكبير قبل الصغير ( وبرضو صباحو عسل بعون الله)
واصبح الاخرين من مستخدمى الانترنت فى مصر هما اللى بيستفيدو استفادة كامله من النت عموما(( يعنى اما قولت النصف دى كانت مجامل كمان للشباب مع انى لو قلت 90% من الشباب هتبقى مقولتى صحيحه بروضو بس خلينا كده نمسك العصايا من النص
وبصراحه انا ليا وجهه نظر فى الموضوع دة
انا شايف ان الانترنت فى مصر لازم يكون ليه سن معين
يعنى مثلا مش نستنى من عيل عنده 10 او 12سنه انو يفتح النت عشان يشوف اخبار العالم الاقتصادى ايه ؟
ومننتظرش من بنت عندها10 او 12 سنه انها تفتح نت عشان تتابع وبشغف اخر التطورات الديموقراطيه للحياه السياسيه للمجتمع الثالث
طب ومالو يا احمد وانت مال ....... لما البنت او الواد يفتحو النت عشان يعملو شات مع بعض
عادى خالص مفيهاش اى حاجه بس الموضوع بيكون ليه تطورات رهيبه
تعالو نعيش مع قصه بنت عندها 14 سنه اسمها ( بكيزه محروس ادينى رنه )
يحكا انا
فى احدى الرومات المغلقه
عاشق شعر الصدر ميزو : هاى ممكن نتعرف
بكيزه محروس ادينى رنه : هاى اه طبعا ممكن
عاشق شعر الصدر ميزو : انا ميزو من المهندسين من شارع جيهان ( اه طبعا دى اللى جنب موقف عربيات رمسيس كده )
بكيزه محروس ادينى رنه : وانا ملك من جاردن سيتى( طبعا اسمها الحقيقى جملات وساكنه فى عزبه الصفيح)
عاشق شعر الصدر ميزو : كام سنه يا ملوكه ( يارب تتطلع صغيره ومش متجوزه )
بكيزه محروس ادينى رنه : عندى 14 سنه ( لا معلومه صحيحه دى )
عاشق شعر الصدر ميزو : ممكن كاميرا يا ملك لو مفيهاش ازعاج
بكيزه محروس ادينى رنه : لا مش هاينفع افتح كاميرا يا ميزو انا لسا معرفكش
عاشق شعر الصدر ميزو : خلاص ممكن مايك طيب ( اى حاجه فى يومك الاسود ده )
بكيزه محروس ادينى رنه : اه ماشى بس ناخد على بعض الاول
عاشق شعر الصدر ميزو : طب انتى بتعملى ايه دلوقتى
بكيزه محروس ادينى رنه : انا بكلمك طبعا ( ايه السؤال الغبى ده )
عاشق شعر الصدر ميزو : طب انا كنت مخنوق وعايز افضفضلك شويه .. ممكن ؟
بكيزه محروس ادينى رنه : اه طبعا ممكن احنا خلاص بقينا اخوات ( بتبدأ دايما باخوات )
عاشق شعر الصدر ميزو : وانا خلاص اعتبرتك زى اختى بالضبط وهاقولك على قصتى
وطبعا بعد محادثه عمرها 15 دقيقه
بيحكى ميزو قصه غالبا بتكون عن ان حبيبته سابته او خانته او ماتت او داستها باخره
ونكمل المحادثه
بكيزه محروس ادينى رنه : ياااه يا ميزو ربنا معاك انتا انسان جميل
عاشق شعر الصدر ميزو : انا مخنوق اوى بعد ماقولت القصه دى
بكيزه محروس ادينى رنه : ميزو ممكن طلب ( اوبا ابتدينا بقى بالطالبات ارغى)
عاشق شعر الصدر ميزو : اتفضلى قولى يا قمر
بكيزه محروس ادينى رنه : ممكن اشوف صورتك ( يارب يطلع عنده شعر صدر زى تامر حسنى )
عاشق شعر الصدر ميزو : عيونى ( نخش بقى جوجل نستنضف صوره كده لشاب حليوه )
بكيزه محروس ادينى رنه : الله قمر والله
عاشق شعر الصدر ميزو : ربنا يخليكى ليا يارب
بكيزه محروس ادينى رنه : انا حاسه ان انتا الانسان اللى بدور عليه ( سبحان الله منتو كنتو اخوات من شويه )
عاشق شعر الصدر ميزو : وانا كمان والله ممكن اشوف صورتك طيب
بكيزه محروس ادينى رنه : طبعا ثانيه واحده ( اما اروح اجبله صورتى وانا فى حمام السباحه الى مودى على المصرف )
عاشق شعر الصدر ميزو : الله الله قمر والمصحف ( ايه الحته الجامده دى )
بكيزه محروس ادينى رنه : ممكن مايك
عاشق شعر الصدر ميزو : حاضر
بعد شويه
عاشق شعر الصدر ميزو : ممكن كاميرا
بكيزه محروس ادينى رنه : حاضر
بعد شويه شويه
بكيزه محروس ادينى رنه : ممكن رقمك
عاشق شعر الصدر ميزو : اتفضلى اهو(هى الى طلبته هى الى طلبته كنت مترهنا على كده مع الواد سيد سبانخ
شويه شويه وتاتا تاتا خط العتبه )
عاشق شعر الصدر ميزو : انا عايز اشوفك على الطبيعه
بكيزه محروس ادينى رنه : هافتح كاميرا حالا
عاشق شعر الصدر ميزو : لا انا عاوز اشوفك
بكيزه محروس ادينى رنه : امممممممممم اوك
وطبعا الكاميرا جرت معاها حاجات كتير والخروجه اكتر
وللاسف دلوقتى البنت دى مهدده دلوقتى بعدد 100 صوره من البرنتات والصور الفاضحه
وميزو دلوقتى عايش اللحظه وملك الى مش اسمها ملك ياعينى هاريه نفسها من العياط
ومش كل البنات كده هى الى عملت كده فى نفسها
وطبعا وقبل كل شيء لكل قاعده شواذ
وهذا هو حال الشات وتأثيره الفسيولوجى على الشباب الصغيرين والبنات الصغيرات
نخش على حاجه تانيه مثلا
الموبايل
تم اختراع الموبايل لظروف عمليه تساعد على الاتصال السريع والتنقل الاسهل
وبعد كده تطور الموبايل بصوره جميله
حتى اصبح الموبايل شىء اساسى فى حياه المواطن المصرى يعنى اهم من اللبس والمظهر والاكل والشرب
تلاقى اطفال فى مدارس شايله الموبايلات وعاملين يتفرجو على المقاطع اللذيذه
وتلاقى شباب فى جامعات قاعدين على سلم المدرج ومقضينها بلوتوث وحركات
حتى الموبايل اصبح استخدامه مضر جدا بالصحه ويسبب الوفاه ( زى السجاير بالضبط )
تيجو نحكى حكايا الشاب اللى اسمو ( احمد ادهم اشرف اخر حاجه )
ولا بلاش عشان دى قصه مؤثره جدا
من الاخر يا جماعه انا حزين على سوء استخدمنا لكل التطور اللى بيحصل حوالينا
المشكله كلها اساسا سببها اننا اتفاجئنا بالتطور دة جى ومش معانا كتالوج لكيفيه استخدامه
يعنى الفلاح كان بيتفرج على فيلم ( المراهقات ) على القناه الثانيه فى ساعه عصارى وكان بيضييييع
فجأه الفلاح ركب ريسيفر وشاف الحاجات اللى عمرو ماشفها قبل كده وضاااع اكتر
والشباب الوحشين اللى كانو بيقعدو على ناصيه الشارع عشان بنت الجيران تبتسم ليهم ويضيعوو
لاقو فجأه حاجه اسمها نت وشاات وبقى يعرفو بنات بسهوله وضاااعو اكتر
وكان الشاب بيبيض عشان ياخد رقم التليفون الارضى بتاع البنت اللى كانت بتكبته على طرف المنديل الابيض بتاعها
ودلوقتى بقى بقمه السهوله بياخده وبقمه السهوله البنت بتغييره
زمان كان العالم بيقعد تايه بين المراجع والكتب عشان يحصل على معلومه عايز يعرفها ويطلع عين امو وعين اهله كلهم
ودلوقتى بقى بمجرد انو يدوس على كمله انتر على موقع جوجل وتجيله المعلومه وهو حاطط رجل على رجل
دة تطور جميل وكل حاجه
بس لازم يستغل صح
الشباب ضايع
والشباب فاااسد واهم حاجه عنده ( البت سوسو والموبايل الصينى ابو شريحيتن والتهرب من الجيش))
وبرضو انا بتكلم على فئه معينه بس من النوع ده وليس المجتمع كلو
زى ما بقول
لكل قاعده شواذ
كل الحكايه ان الموضوع ده كتر شويه فى البلد والواحد بيتكلم مع نفسو كتير فى الموضوع ده وحبيت اطرحو عليكم
يا ترى دى مصر الى قال عنها الرسول صلى الله عليه وسلم (إذا فتح الله عليكم مصراً فتخذوا منهم جنداً كثيرا فأنهم خير أجناد الأرض))
بس انا متفائل
اه والنعمة متفائل
مش عارف ليه ؟؟
ربنا يستر ..
__________________
يالايت كل مايتمانه المرء
يدركه
موضوع: التطور عمل فينا ايه؟؟؟؟ 
الخميس أبريل 08, 2010 4:54 am
